व्याजाचा दर

सभासदांना शक्य तितक्या कमी व्याज दराने कर्ज पुरवठा करावयाचा हाच मुख्य उद्देश सोसायटीच्या स्थापनेबाबत होता. सुरुवातीला म्हणजे १९४७ साली २३ सभासदांना एकूण कर्ज रुपये ४३१/- फक्त देण्यात आले आणि त्यावेळेस व्याजाचा दर होता १ रुपयावर दरमहीना "अर्धा पैसा", म्हणजेच जवळ जवळ ९.४० टक्के. परंतु नंतर तो १०/- रुपयांवर दरमहा ५ पैसे म्हणजे ६ टक्क्यांपर्यंत कमी करण्यात आला. आज व्याजाचा दर आहे १००/- रुपयांवर दरमहा फक्त ९० पैसे म्हणजेच दरसाल दरशेकडा १० रुपये ८० पैसे फक्त, हा व्याज दर प्रचलित व्याज दरापेक्षा खूपच कमी आहे.

कमीत कमी व्याज दराने गरजूंना आर्थिक मदत व्हावी हे सहकार तत्व प्रणालीचे एक अंग आहे. आजवरच्या जाचक सावकारी पिळवणूकीतून,सहकार चळवळींच्या माध्यमातून मोठ्या प्रमाणात सामान्य जनतेची सुटका झाल्यामुळे त्यांना हायसे वाटले आहे. विद्वानांनी म्हटल्याप्रमाणे दान हे सत्पात्री असावे, तसेच कर्ज वाटप हे सत्पात्री म्हणजे योग्य व ख-या गरजवंताला मिळाले पाहीजे याचे भान सहकारी तत्वावर आधारित संघटनेच्या कार्यकारी सदस्यांनी ठेवले पाहीजे.

अशा ह्या 'सहकार' तत्त्वप्रणालीचे आपण सर्वानीच जागृत राहून व डोळसपणे आचरण करून कामगार विकासाच्या जडण घडणेत त्याचा पुरेपूर लाभ उठवुया.